केसांचे काय करायचे?
छे बुवा हे लफडंच आहे केसांचं! मला माझे केस सोडून (आणि बांधून सुद्धा...हा हा हा) सर्वांचे केस सुंदर दिसतात. सरळ केस, कुरळे केस, लाटा लाटांसारखे झुलणारे केस, बेधुंद मुक्त केस, कपाळावर रुळणारे केस,लांबसडक केस,काळेभोर मऊसुत केस,किंचित कुरळे पण किंचित सरळ केस,कानाबरोबर कापलेले छोटे केस,मानेवर रुळणारे आत्मविश्वासी केस,कसेही वळवले तरी सुंदर वळणारे केस, मधोमध भंग पाडलेले केस,चपचपून तेल लावलेले केस,तुर्रेबाज केस,मेंदीने रंगवलेले केस,रंग उडालेले केस,पांढरे केस,खरबरीत केस,विस्कटलेले केस,छान कापलेले केस!!! बापरे किती प्रकार ह्या केसांचे पण एकही प्रकार माझा असा नाही म्हणजे बघा जर कुठे केस वाळवावेत तर नेमका पाण्याचा हात लागतो, ब्लो ड्राय करून बाहेर पडणार इतक्यात पावसाची सर यावी आणि केस चपटे, मस्त पिना बिना लाऊन तयार व्हावं आणि स्वेटर चढवताना नेमकी पिन अडकावी. केस सरळ करावेत तर ट्रेंड कुरळ्या केसांचा येतो, मग परत कुरळे करायचे तर सरळ केस झटक्यात ट्रेंडमध्ये परत हजर! आहे कि नाही पंचाईत? बरं काही नको तो झमेला आपले आहेत ते बरे म्हणून कुठे जावं तर तिथे सगळ्याजणी अश्या काही सूड घेतल्या सारख्या केसांचे प्रकार करून आलेल्या असतात कि आयत्यावेळी आता काय करायचं म्हणून डोकं दुखायचं नाटक करत एकसारखं केसात हात फिरवत बसायला लागतं. कठीण आहे, केसाचं नक्की काय करायचं हे केसांच्या गुंत्यापेक्षा महाकिचकट आहे.
No comments:
Post a Comment